Suid Afrika steek uiteindelik sy kop by die donkereeue uit

Wragtig, een of ander wrintiewaar van Harvard het 'n studie gaan maak. Ja, dit is merkwaardig dat iemand by universiteit 'n studie maak. Soos my Pa nou eendag vir my gesê het: die universiteit is 'n fontein van wysheid waar studente net heen gaan om te drink.

Elkgeval, die Harvard man was nogals ontsteld oor Thabo Mbeki se benadering tot ons Vigs epidemie. Oom Thabo reken mos dis nie 'n virus wat Vigs veroorsaak nie, maar armoede en 'n gebrekkige dieet. Wragtig. Wou sê ek begin mos soos 'n weeskind voel as ek so paar ure lank nie geëet het nie. Ek twyfel darem of Freddy Mercury aan hongersnood omgekom het. Hy het definitief baie goed gevreet, maar hy't nie vir my so vars gelyk so na die einde toe nie. Volgens Oom Thabo was daai nie 'n virus wat vir Freddy aangetas het nie. Laat mens nogals kopkrap.

Oom Thabo reken mos 'n lekker beet gaan jou laat beter voel as jy 'n vigswesie is. Ek weet nou nie so lekker nie. Die dwelms wat die blêrrie rassistiese Westerlinge vir Die Volk wil voer blyk darem vigslyers te verhoed om 'n vigswesie agter te laat, want dit help mos om te keer dat jy vigs by jou moeder kry by geboorte.

Sy groot penarie is dat ARV dwelms jou lewer aantas. Dog doen hy boggerol oor Johnnie Walker. Ons voormalige minister van gesondheid het juis 'n leweroorplanting gehad. Sy leef nog. Gevolglik is dit mos beter as jy ARV dwelms neem en 'n leweroorplanting kry, as wanneer jy verhoed word om rassistiese Westerse medisyne te neem. Dan het jy minder vigs en meer van 'n kans on naweke te spandeer by die watergat saam met twee befaamde lede van ons kabinet, naamlik Johnnie Walker en Jack Daniels.

As hulle nou regtig jou immuniteit wil toets, moet hulle eerder vir almal koshuiskos voer in plaas van ARVs. As jou immuniteit eers koshuiskos gewoond is, is vigs sommer soetkoek.