Graag heet ek U, geagte leser, hartlik welkom by my etniese Afrikaanse blog. Ek is die outeur van 'n gewaagde gruwelprent en swaar metaal resensie blog genaamd The Necro Files. Daar is egter min Afrikaanse blogs waarvan ek weet wat nie ver-Praag is nie.
Selfs hier op Blogger kan mens nie Afrikaans as voertaal kies nie, so ek moes myself maar met Nederlands bemoei. Ook nie te versmaaie nie. Die vokale rol effe meer as wat ek aan gewoond is en dié spuug ook effe meer, maar Nederlanders is darem oor die algemeen gaaf. So, die Kaap is nou maar eenmaal Hollands.
Ek het dus besluit om self 'n Afrikaanse blog te begin met die idee om lekker spek te skiet, konfyt te smeer en kwaad te stook soos net 'n Boer mos kan. Mens moet maar die oog op die koerant hou in ons wonderskone land. Deels omdat daar waarskynlik 'n booswig is wat die dêng wil steel, maar ook omdat mens nie soos 'n lieplapper mampara wil opeindig en jou lewe (en andere s'n) van so min waarde ag dat jy dit sal neerlê vir politici nie.
Verwag dus nou en dan so bietjie bittere politiese kommentaar, 'n paar kwinkslae en heelwat galgehumor. Baie dankie!
30 November 2008
Subscribe to:
Post Comments (Atom)
No comments:
Post a Comment